Ana dilinə aid şeirlər

ÇOX ŞİRİNDİR ANA DİLİM ŞEİRİ

Müəllif: Qalib Bəyməmmədoğlu

Xalçaların naxışıdır,

Nurlu bulaq axışıdır,
Dədə Qorqud alqışıdır,
Şadlıq etsin Oğuz elim.
Çox şirindir ana dilim.

Ana südü qədər təmiz,
Dilim mənə candan əziz.
Qoymaq üçün dünyada iz,
Şən şeirlər yazır əlim,
Çox şirindir ana dilim.

O, mənim saf məhəbbətim,
Şirin, şəkər, bal, şərbətim.
Yoxdur sözə qənaətim,
Tükənməyən varım, ləlim,
Çox şirindir ana dilim.

Müəllif: Mina Rəşid

Ana dilim bal kimi
Danışmaqdan doymuram.
Mən onu neçə dilin
İçində qoruyuram.

Anamın laylasıyla
Mən boy atıb böyüdüm.
Onun şirin diliylə
Fərəhlənib öyündüm.

Çoxlu nağıl söyləyib
Nənəm bu dildə mənə.

Əlifbanı öyrəndim
Mən sevinə-sevinə.

Çox sevirəm yurdumun
Bayrağını, himnini.
Mən sevirəm anamı
Həm də ana dilimi.

Müəllif: Süleyman Rüstəm.

Mən, sənin dilinə dəymirəm, cəllad,
Gəl sən də bu ana dilimə dəymə!
Sənin də bağın var, gülün var, çəkin,
Bağımda əkdiyim gülümə dəymə!

Həsədlərlə baxdım çəmənimə sən,
Gör bir nələr etdin vətənimə sən.
Yan deyib, od vurdun bədənimə sən!
Altında atəş var, külümə dəymə!

Mən ağa ağ dedim, qaraya qara,
Sən məni istədin çəkəsən dara.
Yenicə sağalır vurduğun yara,
Mənim bu yaralı könlümə dəymə!

Ana dilinə aid şeirlər, şeirlər,